advayaparamārthā nāmasaṅgītiḥ

advayaparamārthā nāmasaṅgītiḥ

om namaḥ śrīmahāmañjunāthāya

atha vajradharaḥ śrīmān durdāntadamakaḥ paraḥ|

trilokavijayī vīro guhyarāṭ kuliśeśvaraḥ||1||

vibuddhapuṇḍarīkākṣaḥ protphullakamalānanaḥ|

prollālayan vajravaraṁ svakareṇa muhurmuhaḥ||2||

bhṛkuṭītaraṅgapramukhairanantairvajrapāṇibhiḥ|

durdāntadamakairvīrairvīravībhatsarupibhiḥ||3||

ullālayadibh ḥ svakaraiḥ prasphuradvajrakoṭibhiḥ|

prajñopāyamahākaruṇājagadarthakaraiḥ paraiḥ||4||

hṛṣṭatuṣṭāśayairmuditaiḥ krodhavigraharupibhiḥ|

buddhakṛtyakarairnāthaiḥ sārddhaṁ praṇatavigrahai||5||

praṇamya nāthaṁ saṁbuddhaṁ bhagavantaṁ tathāgatam|

kṛtāñjalipuṭo bhūtvā idamāha sthito'grataḥ||6||

maddhitāya mamārthāya anukampāya me vibho|

māyājālābhisaṁbodheryathālābhi bhavāmyaham||7||

ajñānapaṅkamagnānāṁ kleśavyākulacetasām|

hitāya sarvasattvānāmanuttaraphalāptaye||8||

prakāśayatu saṁbuddho bhagavān śāstā jagadguruḥ|

mahāsamayatattvajña indriyāśayavit paraḥ||9||

bhagavan! jñānakāyasya mahoṣṇīṣasya gīṣpateḥ|

mañjuśrījñānasattvasya jñānamūrteḥ svayambhuvaḥ||10||

gambhīrārthāmudārārthāṁ mahārthāmasamāṁ śivām|

ādimadhyāntakalyāṇīṁ nāmasaṅgītimuttāmām||11||

yātītairbhāṣitā buddhairbhāṣiṣyante hyānāgatāḥ|

pratyutpannāśca saṁbuddhā yāṁ bhāṣante punaḥ punaḥ||12||

māyājāle mahātantre yā cāsmin saṁpragīyate|

mahāvajradharairhṛṣṭairameyairmantradhāribhiḥ||13||

ahaṁ caināṁ dhārayiṣyāmyāniryāṇād dṛḍhāśayaḥ|

yathā bhavāmyahaṁ nātha sarvasaṁbuddhaguhyadhṛk||14||

prakāśayiṣye sattvānāṁ yathāśayaviśeṣataḥ|

aśeṣakleśanāśāya aśeṣājñānahānaye||15||

evamadhyeṣya guhyendro vajrapāṇistathāgatam|

kṛtāñjaliputo bhūtvā prahvakāyaḥsthito'grataḥ||16||

iti adhyeṣaṇājñānagāthāḥ ṣoḍaśa|

atha śākyamunirbhagavān saṁbuddho dvipadottamaḥ|

nirṇamayyāyatāṁ sphītāṁ svajihvāṁ svamukhācchubhām||17||

smitaṁ saṁdaśrya lokānāmapāyatrayaśodhanam|

trilokābhāsakaraṇaṁ caturmārāriśāsanam||18||

trilokamāpūrayantyā brāhma madhurayā girā|

pratyabhāṣata guhyendraṁ vajrapāṇiṁ mahābalam||19||

sādhu vajradhara śrīman sādhu te vajrapāṇaye|

yastvaṁ jagaddhitārthāya mahākaruṇayānvitaḥ||20||

mahārthāṁ nāmasaṅgītiṁ pavitrāmaghanāśinīm|

mañjuśrījñānakāyasya mattaḥ śrotuṁ samudyataḥ||21||

tatsādhu deśayāmyeṣaḥ ahaṁ te guhyakādhipa|

śṛṇu tvamekāgramanāstatsādhu bhagavanniti||22||

iti prativacanajñānagāthāḥ ṣaṭ|

atha śākyamunirbhagavān sakalaṁ mantrakulaṁ mahat|

mantravidyādharakulaṁ vyavalokya kulatrayam||23||

lokalokottarakulaṁ lokālokakulaṁ mahat|

mahāmudrākulaṁ cāgryaṁ mahoṣṇīṣakulaṁ mahat||24|

iti ṣaṭkulāvalokanajñānagāthe dve|

imāṁ ṣaṇmantrarājānāṁ saṁyuktāmadvayo dayām|

anutpādadharmiṇīṁ gāthāṁ bhāṣate sma girāṁpateḥ||25||

a ā i ī u ū e ai o au aṁ aḥ sthito hṛdi|

jñānamūrtirahaṁ buddho buddhānāṁ tryadhvavartinām||26||

om vajratīkṣṇaduḥkhacchedaprajñājñānamūrtaye|

jñānakāyavāgīśvarārapacanāya te namaḥ||27||

iti māyājālābhisaṁbodhikramagāthāstisraḥ|

tadyathā bhagavān buddhaḥ saṁbuddho'kārasambhavaḥ|

akāraḥ sarvavarṇāgryo mahārthaḥ paramākṣaraḥ||28||

mahāprāṇo hyanutpādo vāgadāhāravarjitaḥ|

sarvābhilāpahetvgryaḥ sarvavāksuprabhāsvaraḥ||29||

mahāmahamahārāgaḥ sarvasattvaratiṅkaraḥ|

mahāmahamahādveṣaḥ sarvakleśamahāripuḥ||30||

mahāmahamahāmoho mūḍhadhīmohasūdanaḥ|

mahāmahamahākrodho mahākrodharipurmahān||31||

mahāmahamahālobhaḥ sarvalobhaniṣūdanaḥ|

mahākāmo mahāsaukhyo mahāmodo mahāratiḥ||32||

mahārupo mahākāyo mahāvarṇo mahāvapuḥ|

mahānāmā mahodāro mahāvipulamaṇḍalaḥ||33||

mahāprajñāyudhadharo mahākleśāṅkuśo'graṇīḥ|

mahāyaśā mahākīrtirmahājyotirmahādyutiḥ||34||

mahāmāyādharo vidvān mahāmāyārthasādhakaḥ|

mahāmāyāratirato mahāmāyendrajālikaḥ||35||

mahādānapatiḥ śreṣṭho mahāśīladharo'graṇīḥ|

mahākṣāntidharo dhīro mahāvīryaparākramaḥ||36||

mahādhyānasamādhistho mahāprajñāśarīradhṛk|

mahābalo mahāpāyaḥ praṇidhirjñānasāgaraḥ||37||

mahāmaitrīmayo'meyo mahākāruṇiko'gradhīḥ|

mahāprajño mahādhīmān mahopāyo mahākṛtiḥ||38||

mahāṛddhibalopeto mahāvego mahājavaḥ|

maharddhiko maheśākhyo mahābalaparākramaḥ||39||

mahābhavādrisaṁbhettā mahāvajradharo dhanaḥ|

mahākrūro mahāraudro mahābhayabhayaṅkara||40||

mahāvidyottamo nātho mahāmantrottamo guruḥ|

mahāyānanayāruḍho mahāyānanayottamaḥ||41||

iti vajradhātumaṇḍalajñānagāthāścaturdaśa|

mahāvairocano buddho mahāmaunī mahāmuniḥ|

mahāmantranayodbhūto mahāmantranayātmakaḥ||42||

daśapāramitāprāpto daśapāramitāśrayaḥ|

daśapāramitāśuddhirdaśapāramitānayaḥ||43||

daśabhūmīśvaro nātho daśabhūmipratiṣṭhitaḥ|

daśajñānaviśuddhātmā daśajñānaviśuddhadhṛk||44||

daśākāro daśārthārtho munīndro daśabalo vibhuḥ|

aśeṣaviśvārthakaro daśākāravaśī mahān||45||

anādirniṣprapañcātmā śuddhātmā tathatātmakaḥ|

bhūtavādī yathāvādī tathākārī ananyavāk||46||

advayo dvayavādī ca bhūtakoṭivyavasthitaḥ|

nairātmyasiṁhanirṇādī kutīthryamṛgabhīkaraḥ||47||

sarvatrago'moghagatistathāgatamanojavaḥ|

jino jitārirvijayo cakravartī mahābalaḥ||48||

gaṇamukhyo gaṇācāryo gaṇeśo gaṇapatirvaśī|

mahānubhāvo dhaureyo'nanyaneyo mahānayaḥ||49||

vāgiśo vākpatirvāgmī vācaspatiranantagoḥ|

satyavāk satyavādī ca catuḥsatyopadeśakaḥ||50||

avaivartiko hyanāgāmo khaḍgaḥ pratyekanāyakaḥ|

nānāniryāṇaniryāto mahābhūtaikakāraṇaḥ||51||

arhan kṣīṇāsravo bhikṣurvītarāgo jitendriyaḥ|

kṣemaprāpto'bhayaprāptaḥ śītībhūto hyānāvilaḥ||52||

vidyācaraṇasaṁpannaḥ sugato lokavitparaḥ|

nirmamo nirahaṅkāraḥ satyadvayanayasthitaḥ||53||

saṁsārapārakoṭisthaḥ kṛtakṛtyaḥ sthalasthitaḥ|

kaivalyajñānaniṣṭhiyutaḥ prajñāśastro vidāraṇaḥ||54||

saddharmmo dharmarāḍ bhāsvān lokālokakaraḥ paraḥ|

dharmeśvaro dharmarājaḥ śreyomārgopadeśakaḥ||55||

siddhārthaḥ siddhasaṁkalpaḥ sarvasaṁkalpavarjitaḥ|

nirvikalpo'kṣayo dhāturdharmadhātuḥ paro'vyayaḥ||56||

puṇyavān puṇyasaṁbhāro jñānaṁ jñānākaraṁ mahat|

jñānavān sadasajjñānī saṁbhāradvayasaṁbhṛtaḥ||57||

śāśvato viśvarāḍ yogī dhyānaṁ dhyeyo dhiyāṁpatiḥ|

pratyātmavedyo hyacalaḥ paramādyastrikāyadhṛk||58||

pañcakāyātmako buddhaḥ pañcajñānātmako vibhuḥ|

pañcabuddhātmamukuṭaḥ pañcacakṣurasaṅgadhṛk||59||

janakaḥ sarvabuddhānāṁ buddhaputraḥ parovaraḥ|

prajñābhavodbhavo yonirdharmayonirbhavāntakṛt||60||

ghanaikasāro vajrātmā sadyojāto jagatpatiḥ|

gaganodbhavaḥ svayambhūḥ prajñājñānānalo mahān||61||

vairocano mahādīptirjñānajyotirvirocanaḥ|

jagatpradīpo jñānolko mahātejāḥ prabhāsvaraḥ||62||

vidyārājo'gramantreśo mantrarājo mahārthakṛt|

mahoṣṇīṣo'dbhutoṣṇīṣo viśvadarśī viyatpatiḥ||63||

sarvabuddhātmabhāvāgryo jagadānandalocanaḥ|

viśvarupī vidhātā ca pūjyo, mānyo mahāṛṣiḥ||64||

kulatrayadharo mantrī mahāsamayamantradhṛk|

ratnatrayadharaḥ śreṣṭhastriyānottamadeśakaḥ||65||

amoghapāśo vijayī vajrapāśo mahāgrahaḥ|

vajrāṅkuśo mahāpāśaḥ,

iti suviśuddhadharmadhātujñānagāthāḥ pādonapañcaviṁśatiḥ|

vajrabhairavabhīkaraḥ||66||

krodharāṭ ṣaṇmukho bhīmaḥ ṣaṇṇetraḥ ṣaḍbhujo balī|

daṁṣṭrākarālaḥ kaṅkālo halāhalaḥ śatānanaḥ||67||

yamāntako vighnarājo vajravego bhayaṅkaraḥ|

vighuṣṭavajro hṛdvajro māyāvajro mahodaraḥ||68||

kuliśeśo vajrayonirvajramaṇḍo nabhopamaḥ|

acalaikajaṭāṭopo gajacarmapaṭārdradhṛk||69||

hāhākāro mahāghoro hīhīkāro bhayānakaḥ|

aṭṭahāso mahāhāso vajrahāso mahāravaḥ||70||

vajrasattvo mahāsattvo vajrarājo mahāsukhaḥ|

vajracaṇḍo mahāmodo vajrahūkārahūkṛtiḥ||71||

vajrabāṇāyudhadharo vajrakhaḍgo nikṛntanaḥ|

viśvavajradharo bajrī ekavajrī raṇañjahaḥ||72||

vajrajvālākarālākṣo vajrajvālāśiroruhaḥ|

vajrāveśo mahāveśaḥ śatākṣo vajralocanaḥ||73||

vajraromāṅkuratanurvajraromaikavigrahaḥ|

vajrakoṭinakhārambho vajrasāraghanacchavi||74||

vajramālādharaḥ śrīmān vajrābharaṇabhūṣitaḥ|

hāhāṭṭahāso nirghoṣo vajraghoṣaḥ ṣaḍakṣaraḥ||75||

mañjughoṣo mahānādastrailokyaikaravo mahān|

ākāśadhātuparyantaghoṣo ghoṣavatāṁ varaḥ||76||

ityādarśajñānagāthāḥ pādena sārdhaṁ daśa|

tathatābhūtanairātmyabhūtakoṭiranakṣaraḥ|

śūnyatāvādivṛṣabho gambhīrodāragarjanaḥ||77||

dharmaśaṅkho mahāśabdo dharmagaṇḍī mahāraṇaḥ|

apratiṣṭhitanirvāṇo daśadigdharmadundubhiḥ||78||

arupo rupavānagryo nānārupo manomayaḥ|

sarvarupāvabhāsaśrīraśeṣapratibimbadhṛk||79||

apradhṛṣyo maheśākhyastraidhātukamaheśvaraḥ|

samucchritāryamārgastho dharmaketurmahodaya||80||

trailokyaikakumārāṅgaḥ sthaviro vṛddhaḥ prajāpati|

dvātriṁśallakṣaṇadharaḥ kāntastrailokyasundaraḥ||81||

lokajñānaguṇācāryo lokācāryo viśāradaḥ|

nāthastrātā trilokāptaḥ śaraṇaṁ tāyyanuttaraḥ||82||

gaganābhogasambhogaḥ sarvajñajñānasāgaraḥ|

avidyāṇḍakośasaṁbhettā bhavapañjaradāraṇaḥ||83||

śamitāśeṣasaṁkleśaḥ saṁsārārṇavapāragaḥ|

jñānābhiṣekamukuṭaḥ samyaksaṁbuddhabhūṣaṇaḥ||84||

triduḥkhaduḥkhaśamanastryanto'nantastrimuktigaḥ|

sarvāvaraṇanirmukta ākāśasamatāṁ gataḥ||85||

sarvakleśamalātītastryadhvānadhvagatiṁ gataḥ|

sarvasattvamahānāgo guṇaśekharaśekharaḥ||86||

sarvopadhivinirmukto vyomavatrmani susthitaḥ|

mahācintāmaṇidharaḥ sarvaratnottamo vibhuḥ||87||

mahākalpataruḥ sphīto mahābhadraghaṭottamaḥ|

sarvasattvārthakṛtkarttā hitaiṣī sattvavatsalaḥ||88||

śubhāśubhajñaḥ kālajñaḥ samayajñaḥ samayo vibhuḥ|

sattvendriyajño velajño vimuktitrayakovidaḥ||89||

guṇī guṇajño dharmajñaḥ praśasto maṅgalodayaḥ|

sarvamaṅgalamāṅgalyaḥ kīrtirlakṣmīryaśaḥ śubhaḥ||90||

mahotsavo mahāśvāso mahānando mahāratiḥ|

satkāraḥ satkṛtirbhūtiḥ pramodaḥ śrīryaśaspatiḥ||91||

vareṇyo varadaḥ śreṣṭhaḥ śaraṇyaḥ śaraṇottamaḥ|

mahābhayāriḥ pravaro niḥśeṣabhayanāśanaḥ||92||

śikhī śikhaṇḍī jaṭilo jaṭī mauṇḍī kirīṭimān|

pañcānanaḥ pañcaśikhaḥ pañcacīrakaśekharaḥ||93||

mahābratadharo mauñjī brahmacārī bratottamaḥ|

mahātapāstaponiṣṭhaḥ snātako gautamo'graṇī||94||

brahmavid brāhmaṇo brahmā brahmanirvāṇamāptavān|

muktirmokṣo vimokṣāṅgo vimuktiḥ śāntatā śivaḥ||95||

nirvāṇaṁ nirvṛtiḥ śāntiḥ śreyo niryāṇamantagaḥ|

sukhaduḥkhāntakṛnniṣṭhā vairāgyamupadhikṣayaḥ||96||

ajayo'nupamo'vyakto nirābhāso nirañjanaḥ|

niṣkalaḥ sarvago vyāpī sūkṣmo bījamanāśravaḥ||97||

arajo virajo vimalo vāntadoṣo nirāmayaḥ|

suprabuddho vibuddhātmā sarvajñaḥ sarvavitparaḥ||98||

vijñānadharmatātīto jñānamadvayarupadhṛk|

nirvikalpo nirābhogastryadhvasaṁbuddhakāryakṛt||99||

anādinidhano buddha ādibuddho niranvayaḥ|

jñānaikacakṣuramalo jñānamūrtistathāgataḥ||100||

vāgīśvaro mahāvādī vādirāḍ vādipuṅgavaḥ|

vadatāṁvaro variṣṭho vādisiṁho'parājitaḥ||101||

samantadarśī prāmodyastejomālī sudarśanaḥ|

śrīvatsaḥ suprabho dīptirbhābhāsurakaradyutiḥ||102||

mahābhiṣagvaraḥ śreṣṭhaḥ śalyahartā niruttaraḥ|

aśeṣabhaiṣajyataruḥ kleśavyādhirmahāripuḥ||103||

trailokyatilakaḥ kāntaḥ śrīmān nakṣatramaṇḍalaḥ|

daśadigvyomaparyyanto dharmadhvajamahocchrayaḥ||104||

jagacchatraikavipulo maitrīkaruṇamaṇḍalaḥ|

padmanṛtyeśvaraḥ śrīmān ratnacchatro mahāvibhuḥ||105||

sarvabuddhamahārājaḥ sarvabuddhātmabhāvadhṛk|

sarvabuddhamahāyogaḥ sarvabuddhaikaśāsanaḥ||106||

vajraratnābhiṣekaśrīḥ sarvaratnādhipeśvaraḥ|

sarvalokeśvarapatiḥ sarvavajradharādhipaḥ||107||

sarvabuddhamahācittaḥ sarvabuddhamanogatiḥ|

sarvabuddhamahākāyaḥ sarvabuddhasarasvatī ||108||

vajrasūryyamahāloko vajrenduvimalaprabhaḥ|

virāgādimahārāgo viśvavarṇojjvalaprabhaḥ||109||

sambuddhavajraparyaṅko buddhasaṅgītidharmadhṛk|

buddhapadmodbhavaḥ śrīmān sarvajñajñānakoṣadhṛk||110||

viśvamāyādharo rājā buddhavidyādharo mahān|

vajratīkṣṇo mahākhaḍgo viśuddhaḥ paramākṣaraḥ||111||

duḥkhacchedamahāyānavajradharmamahāyudhaḥ|

jinajig vajragāmbhīryo vajrabuddhiryathārthavit||112||

sarvapāramitāpūrī sarvabhūmivibhūṣaṇaḥ|

viśuddhadharmanairātmyaḥ samyagjñānenduhṛtprabhaḥ||113||

māyājālamahodyogaḥ sarvatantrādhipaḥ paraḥ|

aśeṣavajraparyaṅko niḥśeṣajñānakāyadhṛk||114||

samantabhadraḥ sumatiḥ kṣitigarbho jagaddhṛtiḥ|

sarvabuddhamahāgarbho viśvanirmāṇacakradṛk||115||

sarvabhāvasvabhāvāgyra ḥ sarvabhāvasvabhāvadhṛk|

anutpādadharmā viśvārthaḥ sarvadharmasvabhāvadhṛk||116||

ekakṣaṇamahāprājñaḥ sarvadharmāvabodhadhṛk|

sarvadharmābhisamayo bhūtāntamuniragradhīḥ||117||

stimitaḥ suprasannātmā samyaksaṁbuddhabodhidhṛk|

pratyakṣaḥ sarvabuddhānāṁ jñānārciḥ suprabhāsvaraḥ||118||

iti pratyavekṣaṇajñānagāthāḥ dvācatvāriṁśat|

iṣṭārthasādhakaḥ paraḥ sarvāpāyaviśodhakaḥ|

sarvasattvottamo nāthaḥ sarvasattvapramocakaḥ||119||

kleśasaṁgrāmaśūraikaḥ ajñānaripudarpahā|

dhīśṛṅgāradharaḥ śrīmān vīrabībhatsarupadhṛk||120||

bāhudaṇḍaśatākṣepapadanikṣepanarttanaḥ|

śrīmacchatabhujābhogagaganābhoganarttanaḥ||121||

ekapādatalākrāntamahīmaṇḍatale sthitaḥ|

brahmāṇḍaśikharākrāntapādāṅguṣṭhanakhe sthitaḥ||122||

ekārtho'dvayadharmārthaḥ paramārtho'vinaśvaraḥ|

nānāvijñaptirupārthaścittavijñānasaṁtatiḥ||123|

aśeṣabhāvārtharatiḥ śūnyatāratiragradhīḥ |

bhavarāgādyatītaśca bhavatrayamahāratiḥ||124||

śuddhaḥ śubhrābhradhavalaḥ śaraccandrāṁśusuprabhaḥ|

bālārkamaṇḍalacchāyo mahārāganakhaprabhaḥ||125||

indranīlāgrasaccīro mahānīlakacāgradhṛk|

mahāmaṇimayūkhaśrīrbuddhanirvāṇabhūṣaṇaḥ ||126||

lokadhātuśatākampī ṛddhipādamahākramaḥ|

mahāsmṛtidharastattvaścatuḥsmṛtisamādhirāṭ||127||

bodhyaṅgakusumāmodastathāgataguṇodadhiḥ|

aṣṭāṅgamārganayavit samyaksaṁbuddhamārgavit ||128||

sarvasattvamahāsaṅgo niḥsaṅgo gaganopamaḥ|

sarvasattvamanojātaḥ sarvasattvamanojavaḥ||129||

sarvasattvetdriyārthajñaḥ sarvasattvamanoharaḥ|

pañcaskandhārthatattvajñaḥ pañcaskandhaviśuddhadhṛk||130||

sarvaniryāṇakoṭisthaḥ sarvaniryāṇakovidaḥ|

sarvaniryāṇamārgasthaḥ sarvaniryāṇadeśakaḥ||131||

dvādaśāṅgabhavotkhāto dvādaśākāraśuddhadhṛk|

catuḥsatyanayākāro aṣṭajñānāvabodhadhṛk||132||

dvādaśākārasatyārthaḥ ṣoḍaśākāratattvavit|

viṁśatyākārasaṁbodhirvibuddhaḥ sarvavitparaḥ||133||

ameyabuddhanirmāṇakāyakoṭivibhāvakaḥ|

sarvakṣaṇābhisamayaḥ sarvacittakṣaṇārthavit||134||

nānāyānanayopāyajagadarthavibhāvakaḥ|

yānatritayaniryāta ekayānaphale sthita||135||

kleśadhātuviśuddhātmā karmadhātukṣayaṅkaraḥ|

oghodadhisamuttīrṇo yogakāntāranisṛtaḥ||136||

kleśopakleśasaṁkleśasuprahīṇasavāsanaḥ|

prajñopāyamahākaruṇā amoghajagadarthakṛt||137||

sarvasaṁjñāprahoṇārtho vijñānārtho nirodhakṛt|

sarvasattvamanoviṣayaḥ sarvasattvamanogatiḥ||138||

sarvasattvamano'ntasthastaccittasamatāṅgataḥ|

sarvasattvamanohlādī sarvasattvamanoratiḥ||139||

siddhānto vibhramāpetaḥ sarvabhrāntivivarjitaḥ|

niḥsaṁdigdhamatistryarthaḥ sarvārthastriguṇātmakaḥ||140||

pañcaskandhārthastrikālaḥ sarvakṣaṇavibhāvakaḥ|

ekakṣaṇābhisaṁbuddhaḥ sarvabuddhasvabhāvadhṛk||141||

anaṅgakāyaḥ kāyāgyraḥ kāyakoṭivibhāvakaḥ |

aśeṣarupasandarśī ratnaketurmahāmaṇiḥ||142||

iti samatājñānagāthāścaturviśatiḥ|

sarvasaṁbuddhaboddhavyo buddhabodhiranuttaraḥ|

anakṣaro mantrayonirmahāmantra kulatrayaḥ||143||

sarvamantrārthajanako mahābinduranakṣaraḥ|

pañcākṣaro mahāśūnyo binduśūnyaḥ ṣaḍakṣaraḥ||144||

sarvākāro nirākāraḥ ṣoḍaśārdhārdhabindudhṛk|

akalaḥ kalanātīścaturthadhyānakoṭidhṛk||145||

sarvadhyānakalābhijñaḥ samādhikulagotravit |

samādhikāyaḥ kāyāgyraḥ sarvasaṁbhogakāyarāṭ||146||

nirmāṇakāyaḥ kāyāgyro buddhanirmāṇavaṁśadhṛk|

daśadigviśvanirmāṇo yathāvajjagadarthakṛt||147||

devātidevo devendraḥ surendro dānavādhipaḥ|

amarendraḥ suraguruḥ pramathaḥ pramatheśvaraḥ||148||

uttīrṇabhavakāntāra ekaḥ śāstā jagadguruḥ|

prakhyātadaśadigloko dharmadānapatirmahān||149||

maitrīsannāhasannaddhaḥ karuṇāvarmavarmitaḥ|

prajñākhaḍgo dhanurbāṇaḥ kleśājñānaraṇañjahaḥ||150||

mārārirmārajidvīraścaturmārabhayāntakṛt|

sarvamāracamūjetā sambaddho lokanāyakaḥ||151||

vandyaḥ pūjyo'bhivādyaśca mānanīyaśca nityaśaḥ|

arcanīyatamo mānyo namasyaḥ paramo guruḥ||152||

trailokyaikakramagatirvyomaparyyantavikramaḥ|

traividyaḥ śrotriyaḥ pūtaḥ ṣaḍabhijñaḥ ṣaḍanusmṛtiḥ ||153||

bodhisattvo mahāsattvo lokātīto maharddhikaḥ|

prajñāpāramitāniṣṭhaḥ prajñātattvatvamāgataḥ ||154||

ātmavitparavitsarvaḥ sarvīyo hyagrapudgalaḥ|

sarvopamāmatikrānto jñeyo jñānādhipaḥ paraḥ||155||

dharmadānapatiḥ śreṣṭhaścaturmudrārthadeśakaḥ|

paryupāsyatamo jagatāṁ niryāṇatrayayāyinām||156||

paramārthaviśuddhaśrīstrailokyasubhago mahān|

sarvasampatkaraḥ śrīmān mañjuśrīḥ śrīmatāṁvaraḥ||157||

iti kṛtyānuṣṭhānajñānagāthāḥ pañcadaśa|

namaste varadavajrāgyra bhūtakoṭe namo'stu te|

namaste śūnyatāgarbha buddhabodhe namostu te||158||

buddharāga namaste'stu buddhakāma namo namaḥ|

buddhaprīte namastubhyaṁ buddhamoda namo namaḥ||159||

buddhasmita namastubhyaṁ buddhahāsa namo namaḥ|

buddhavāca namastubhyaṁ buddhabhāva namo namaḥ||160||

abhavodbhava namastubhyaṁ namaste buddhasaṁbhava|

gaganodbhava namastubhyaṁ namaste jñānasaṁbhava||161||

māyājāla namastubhyaṁ namaste buddhanāṭaka|

namaste sarvasarvebhyo jñānakāya namo'stu te||162||

Technical Details

Text Version: 

Romanized

Input Personnel: 

DSBC Staff

Input Date: 

2004

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0